Datum:

Opskrif:

Nuus: Afrikaanse Bybel 85 jaar oud Vyf-en-tagtig jaar gelede, op 27 Augustus 1933, is die eerste volledige Afrikaanse Bybel in Bloemfontein bekendgestel. Die hersiene uitgawe het in 1953 verskyn. Toe die eerste Bybels op 1 Junie 1933 by die Bybelhuis in Kaapstad uitgepak is, het ds FX Roome, die President van die Bybelgenootskapkomitee gesê: "Vandag kan die Afrikaanse volk vir die eerste keer die Bybel in sy eie taal opneem en aan sy hart druk. Dit is vir ons rede tot innige dankbaarheid." Die Bybelgenootskap is vandag steeds dankbaar vir elke Bybel wat versprei word, nie net in Afrikaans nie, maar in al die tale van ons land. Die Bybelgenootskap het reeds meer as 7,6 miljoen eksemplare van die 1933/1953-vertaling van die Afrikaanse Bybel in verskillende gedrukte formate versprei. Op 2 Desember 1983, 50 jaar na die verskyning van die eerste Afrikaanse Bybel, verskyn die 1983-vertaling van die Bybel in Kaapstad. Die afgelope 35 jaar is daar reeds sowat 4,1 miljoen gedrukte eksemplare van hierdie Bybel versprei. Beide bogenoemde vertalings is ook beskikbaar in braille en oudio en in verskillende e-boekformate. Die vertalings is aanlyn beskikbaar en kan op selfone afgelaai word. In 2017 alleen is daar byna 108 000 eksemplare van die twee bogenoemde vertalings op selfone afgelaai. Die groot nuus is dat Die Bybel: 'n Direkte Vertaling waarna daar met groot verwagting uitgesien word, na verwagting teen die einde van 2020 sal verskyn. Die Bybelgenootskap herdenk sy 200ste bestaansjaar in Suid-Afrika in 2020 en ons is opgewonde om weer, op versoek van die kerke wat die Bybel in Afrikaans gebruik, 'n Bybel vir die volgende geslagte Afrikaanssprekendes bekend te stel.