Datum:

Opskrif:

Gedagte: 08 Junie - Gedagte vir die Week: Span jou seile, Deneysville Gister se erediens het my weer laat besef hoe ongelooflik God se roepstem oor ons gemeente hang. In Jesaja 60 hoor ons die woorde: “Kom Jerusalem, laat skyn jou lig!” — en soos Ds. Dirk gesê het: “Kom Deneysville, span jou seile! Vir jou het die lig gekom…” Dis so maklik om vas te kyk in alles wat donker voel — geweld, bekommernisse, onsekerheid, mense wat swaarkry. Maar God sê nie vir ons om op die duisternis te fokus nie. Hy sê: “Kyk rondom jou… span net jou seile.” Met ander woorde: Moenie wag vir perfekte omstandighede nie. Moenie dink jy moet eers sterker, beter of meer gereed wees nie. Die wind van God se Gees waai reeds. Ons deel is eenvoudig: span die seile. Maak oop vir beweging. Maak oop vir gehoorsaamheid. Maak oop vir God se lig om deur jou te skyn — in jou huis, jou werk, jou skool, jou dorp. Hierdie week wil ek jou uitdaag om net één ding te doen: Kyk waar God reeds besig is… en span jou seile daar. Soms is dit ’n klein gebaar. Soms ’n woord van hoop. Soms net om iemand raak te sien. Maar elke keer vang jy ’n bietjie meer van die Wind wat God gee. Mag hierdie week vir jou ’n “lig-week” wees. Mag jy die beweging voel. Mag jy die Wind hoor. Mag jy die seile span.